Un mucha-muhé di 2 aña ku a nase na Kòrsou. Su kuriosidat ta e motor, pa siña nos muchanan na kas opheto-, palabra-, formanan i hopi mas. Esaki semper e ta hasi den kompania di su amigunan. Ku un karakter balente i alegre Èni ta disfrutá kada paso siñando kosnan nobo.

Pako ta e maskota di Èni. Un kachó ku un rabu ku no ta stòp di yanga. E gusta hunga i tambe ta hopi kurioso. Tur kaminda ku Èni bai, Pako tambe ta presente. Tur kos ku Pako mira e ta kere ta kuminda.

Lupita ta aparesé solamente ora Èni mester di dje. E ta wòrdu yamá i ta aparesé durante su kantika. Di e manera aki Lupita ta yuda dunando mas detaye di e obheto-, palabra- i formanan ku ta wòrdu siñá.

Mas personahe

Tokante nos

Komo mayor ta bunita pa wak e kuriosidat di nos yunan, pa deskubrí i siña kosnan nobo. Pero e parti di mas bunita ta, pa ta enbolbí den e fase aki huntu ku nan. Awendia nos muchanan ta lanta den un mundu ku teknologia hopi avansá, ku ta hasié mas aksesibel pa nan skohe lokual nan kier wak i tambe den kua idioma, faltando nos idioma komo un opshón di eskoho.

Nos ta kere den e ponensia ku ta bisa; muchanan ku por dominá nan idioma materno, lo siña otro idiomanan aun mas fásil i tambe lo por ekspresá nan mes mihó den nan propio idioma. Esaki lo inkrementá nan outoestima for di trempan.

Mirando tur e puntonan aki, ami Layssa Vos-Pimentel y mi kasá Dave Vos, mayornan di 2 yu, un di 5 aña i un di 10 luna, a bin riba e idea di krea un karikatura na Papiamentu/o pa mucha di entre 0-5 aña, pa e islanan Aruba, Kòrsou i Boneiru. For di e momento ku e pèn a hasi promé kontakto ku e blachi blanku, nos idea a kombertí den algu mas ku un simpel idea.
Èni a nase!

Mesora Èni a kuminsá definí su propósito mas mihó. E propósito ku Èni tin huntu ku su bestia -amiguitunan; Pa huntu ku tur mucha diskubrí i siña forma-, palabra-, ophetonan i hopi mas di un manera interaktivo, lagando nos muchanan sinti nan mes identifiká.

Nos mishon ta pa sigui yuda i aportá na e desaroyo di vokabulario i edukativo di nos muchanan for di un edat trempan, usando diferente medio interaktivo pa asina nos muchanan divertí aun mas. Di e forma aki nos ta yuda krea un base aun mas fuerte di nos idioma, kuminsando for di na kas. Nos lo sigui inová nos kreatividat pa sigui produsí mas material edukativo i interaktivo pa asina nos komo mayor/tutor ta mas enbolbí den e desaroyo di nos yunan.